A inscrición nas actividades estará aberta ata o 17 de novembro
O Departamento de Igualdade do Concello de Brión (@igualdade_brion) programa a “Semana 25 N”, unha variada programación dirixida a veciños e veciñas do municipio co obxectivo de sensibilizalos na loita contra a violencia machista que se complementará coa tradicional programación dirixida aos centros escolares do municipio. A “Semana 25N” inclúe charlas para maiores e para homes, teatro, un obradoiro de autodefensa e a volta da andaina a prol do bo trato. A participación é totalmente de balde, se ben é preciso anotarse antes do 17 de novembro en bea@briondixital.org ou no teléfono 981 50 99 10 (ext. 51).
Toda a programación terá lugar no centro social polivalente de Brión, con excepción da andaina e a lectura do manifesto do 25 de novembro. Así, o luns 22 de novembro, ás 11:00 horas, terá lugar unha proxección e debate “Violencias machistas nas mulleres maiores”, na que poderán participar ata sesenta persoas maiores de 65 anos. Trátase dunha actividade que forma parte da campaña “De Fronte”, promovida pola Deputación da Coruña e á que o Concello de Brión está adherido.
O martes 23, de 19:45 a 21:45 horas, Xosé Cabido impartirá a charla obradoiro “Masculinidades Positivas: construíndo novos xeitos de ser home”, dirixida a homes maiores de 16 anos. Unha iniciativa na que poderán participar 25 veciños de Brión para que se sintan parte do cambio e se liberen das cargas que unha sociedade machista leva séculos poñéndolles enriba das costas.
O mércores 24, ás 20:00 horas, o auditorio do polivalente acollerá a posta en escena de “Tabú”, unha obra de Carme Conde realizada a través de conversas con mulleres maiores de diferentes puntos de Galicia sobre os tabús, a picaresca e o secretismo que había en torno ao sexo e á sexualidade nos tempos de antes. Dirixido a maiores de 13 anos, o límite de prazas é de sesenta. O propio 25 de novembro, ás 12:00 horas, terá lugar un acto de lectura do manifesto contra a violencia de xénero e dunhas poesías da campaña “De Fronte”. Será na praza do Concello de Brión, edificio que pola noite estará alumeada de lila nas noites do 24 e 25.
Karate en cadeira de rodas
O venres 25, de 18:00 a 20:00 horas, Kristy Tojo, campioa europea de Parakarate e experta en autodefensa feminista do Clube Deportivo Avalon Kai, impartirá un Obradoiro de Autodefensa. Dirixido a mulleres maiores de 16 anos ata un límite de 25 prazas, que aprenderán recursos e ferramentas psicolóxicas e físicas para afrontar o día a día, con técnicas mentais e físicas coas cales afrontar situacións de violencias machistas, baixo a lei do mínimo esforzo e a máxima eficacia.
Finalmente, o sábado 27 de novembro, ás 10:30 horas, terá lugar a Andaina “A prol do bo trato”, cun percorrido de 10 km con saída e chegada na carballeira de Santa Minia. Antes da saída farase entrega dun agasallo a todas as persoas que participen, así como dun avituallamento para o camiño. O límite será de 400 persoas participantes.
Centros educativos
Así mesmo, o Concello de Brión manterá a programación anual de actividades de igualdade nos distintos centros educativos. Así, o 18 e 19 de novembro, as escolas infantís de Sabaxáns e Os Ánxeles, así como o alumnado de infantil do CEIP de Pedrouzos, asistirán ao espectáculo musical “Soñando inventei”, unha mestura de música e poesías a cargo de María Faltri e Jorge Juncal. No caso do CEIP de Pedrouzos, o Concello de Brión ofreceu actividades de Igualdade, pero xa teñen cuberta esta área coa programación da Consellería de Educación.
Para o IES de Brión están programados obradoiros en todos os niveis educativos, que comezarán neste mes de novembro e durarán durante todo o curso. Os cursos programados son: “Educación Afectivo – Sexual” (para 1º e 3º ESO, a cargo de Belén Montesa), “O meu corpo é meu” e “Dando a chapa pola Igualdade” (para 2º da ESO, a cargo de Sergio Trillo de Psiconova), “Desmontando os mitos do amor romántico” (para 4º da ESO, a cargo de Sergio Trillo) e “Desactivando o machismo” (para 1º de BAC, a cargo de Sara Vierna).
